З ёга ўсяго многа, або 5 пытанняў на шляху да дыванка

Агулам ёга — гэта комплекс фізічных, духоўных і філасофскіх практык, але сёння мы разглядаем ёгу выключна ў еўрапейскім рэчышчы папулярнага фітнэс-кірунку. Практыкі супакойваюць нервы і ўмацоўваюць арганізм, уся «палітінфармацыя» ідзе ў якасці бонусу і дакладна не можа паўплываць на вас, калі вы гэтага не пажадаеце. Як занятак айкідо не зробіць з вас даоса, а лыжны спорт — нарвежца. (Хоць праваслаўная, некаторыя цячэнні пратэстанцкай царквы, іслам, артадаксальны іўдаізм не ўхваляюць заняткаў).

Між тым, ніжэй мы сабралі напрамкі хатха-ёгі, дзе канцэнтрацыя — на спартыўным баку асан. Абірайце той, што больш даспадобы вам:

• Інь — статычныя практыкаванні (да 10 хвілінаў у адной позе!), выдатна пасуе для пачаткоўцаў, якія мала рухаюцца.
• Віньяса-флоў — кірунак хатха-ёгі, які вылучаецца дынамікай, плаўнасцю рухаў і моцнай повяззю паміж дыханнем і рухам.
• Кундаліні — ідэальная для падтрымкі хрыбетніка.
• Бікрам — 26 асан, ідуць ад простай да складанай.
• Майсор — плаўны, бяспечны і дасяжны шлях ёга-практык.
• Айенгара — канцэнтрацыя на ідэальным, дэталёвым выкананні асан. Часта выкарыстоўваюцца дадатковыя прыстасаванні і элементы.

Ёга сёння лічыцца «жаночым прадуктам» у асноўным праз тое, што жанчыны часцей незадаволеныя сваім знешнім выглядам, ім прасцей прадаць фітнэс. Між тым, ёга — цудоўная форма фізічнай актыўнасці, якая даступная ўсім людзям. Хваробы сардэчна-сасудзістай сістэмы — асноўная прычына мужчынскіх смерцяў у свеце. Ёга дапамагае наладзіць працу сэрца і сасудаў, а таксама падтрымлівае нервовую сістэму, яна эфектыўная пры комплексным лячэнні дэпрэсіі, зніжае ўзровень гармонаў стрэсу. І гэта ўжо не кажучы пра тое, што ў сучасным свеце так мала месцаў, куды мужчына можа надзець стылёвыя легінсы!

Адказ на гэтае пытанне залежыць ад таго, у каго вы спытаецеся. Людзі, для якіх ёга — частка духоўнага жыцця, адназначна скажуць, што мясаедам тут няма месца. Тыя, хто ходзіць на ёгу без задніх думак і філасофскага падтэксту, у сваю чаргу, прызнаюцца, што і з мясам ёга заходзіць добра.

Няма непасрэднага ўказання на тое, што тым, хто займаецца ёгай, нельга есці мяса, але гэтая духоўная практыка заснаваная на прынцыпе ненанясення шкоды — ахімсы. З гэтага пункту гледжання ўжыванне мяса і іншых прадуктаў жывёльнага паходжання выглядае, як парушэнне асноў. Між тым, калі ўспрымаць ёгу выключна як комплекс цікавых практыкаванняў-асан, этычны і філасофскі кантэкст не будуць дакранацца да вашай талеркі. Хоць з практычнага боку лепш не наядацца перад заняткамі і аддаваць перавагу лёгкім прадуктам.

Адназначнае НЕ. Пры ўсім падабенстве да папярэднега пункта, адказ на гэтае пытанне ніякім чынам не звязаны з маральным ці ідэалагічным бокам заняткаў ёгай. Сумяшчаць алкагольныя загулы і фізічныя практыкаванні — дрэнная ідэя перш за ўсё праз медыцынскія перасцярогі. Дактары і інструктары раяць адкласці фізічныя нагрузкі на 36 гадзінаў пасля ўжывання спіртавых напояў, да якіх адносіцца і піва (дадалі мы на ўсялякі выпадак). Ужыванне алкаголю правакуе абязводжванне, дрэнна адбіваецца на каардынацыі, шкодзіць страўніку і іншым чынам перашкаджае плённым заняткам. Лепш, каб прага да здаровага ладу жыцця і алкаголь не перашкаджалі адно адному.

Апошняе пытанне звычайна больш падобнае да сцвярджэння. Маўляў, вунь яны якія прыгожыя ўсе, стройныя, гнуткія, адразу разумеюць, дзе анатасана, дзе шавасана і не ржуць з Мандукасана. Але мы ўпэўніваем, што правільны ёга-клас — гэта прастора паразумення і добрага стаўлення адно да аднога. Падчас ёгі могуць здарацца розныя неспадзяванкі: паверце, хруст каленак — не самы сорамны гук, які можа выдаць ваш арганізм на занятках, але гэта здараецца з усімі. А значыць, трэба атрымліваць задавальненне ад працэсу, а не баяцца выглядаць неідэальна.

Легенды кажуць, што калі ўстаць а пятай раніцы, падпаліць араматычныя палачкі і заняцца ёгай, атрымаеш зарад бадзёрасці і рашучасці на ўвесь дзень. На ўласны густ можна дадаць бераг акіяну ці сасновы лес. Прынамсі так выглядае ідэальны ўрок у сацыяльных сетках і рэкламе. Рэчаіснасць не вымагае інстаграмнай карцінкі, для паспяховых заняткаў вам дастаткова мець:

• Прастора. У вас павінна быць досыць месца для таго, каб легчы на падлогу ў поўны рост ці развесці рукі.
• Час. Вызваліце досыць часу для таго, каб з задавальненнем і асэнсаванасцю пазаймацца. Лічыцца, што лепш займацца раніцою, але мяркуйце па сабе.
• Адзенне. Падбярыце зручную форму, якая не будзе замінаць рухацца, не будзе ціснуць ці націраць.
• Узор. Знайдзіце курсы, відэаўрокі ў сеціве, апісання практыкаванняў ці аднадумцаў з досведам, каб даведацца пра асаны.
• Матэрыялы. Дыванок, араматычныя палачкі і іншыя атрыбуты зробяць вашы заняткі максімальна прыемнымі, але яны не абавязковыя для ўдалай практыкі.

Добрых вам заняткаў і зарубіце сабе на карме: ёга бывае карыснай і для цела, і для свядомасці.