«Цешчын язык» і іншыя стравы з кабачка

Што ўзяць:

• 3 кг кабачкоў;
• 0,5 кг балгарскага перцу;
• 0,5 кг памідораў ці 0,5 л таматнага соўсу;
• 1 горкі перац;
• 100 гр часнаку;
• 0,5 шклянкі алею;
• 100 мл воцату;
• 2 ст. л. солі;
• 1 шклянка цукру.

Як гатаваць:

Кабачкі лепей браць маладыя — закуска атрымаецца больш далікатнай.

1. Мыем усю гародніну, часнок чысцім, з перцу выдаляем насенне, а з памідораў — пладаножкі.
2. З кабачкоў зразаем лупіну і наразаем мякаць тонкімі слайсамі (каля 3 мм таўшчынёй) памерам прыблізна 1.5*2.5 см.
3. Часнок, перцы і памідоры прапускаем праз мясарубку (не буйны нож).
4. Злучаем у вялікім рондлі кабачкі, часнок, перцы, памідоры, соль, цукар і алей.
5. Добра перамешваем і ставім на сярэдні агонь. Даводзім да кіпення і крыху змяншаем тэмпературу. Варым хвілін 20, перыядычна памешваючы.
6. Дадаем у закуску воцат і варым яшчэ хвілін 20, усё яшчэ памешваючы.
7. Ну і, нарэшце, раскладваем у стэрылізаваныя слоікі ды закатваем.

Што ўзяць:

• 3 кг кабачкоў;
• 0,5 кг морквы;
• 0,5 кг цыбулі;
• 200 гр цукру;
• 1 шклянка алею;
• 3 ст. л. солі;
• 125 мл воцату.

Як гатаваць:

1. Мыем гародніну. Кабачкі чысцім ад лупіння і насення, цыбулю з морквай таксама чысцім — і ўсё наразаем такім чынам, каб было зручна прапускаць праз
   мясарубку (сярэдні нож).
2. Дадаем да гародніны цукар, соль і алей. Перамешваем і ставім на сярэдні агонь. Варым 40 хвілін, перыядычна памешваючы.
3. За некалькі хвілін да сканчэння прыгатавання дадаем воцат і зноўку добра перамешваем.
4. Раскладваем ікру па стэрылізаваных слоіках ды закатваем.

Дарэчы: падчас прыгатавання закатак воцат заўжды дадаецца напрыканцы працэсу, бо ён выпараецца пры кіпенні.

Што ўзяць:

• кабачкі;
• капуста (без храпкі);
• зялёныя памідоры;
• спаржавая фасоля;
• салодкі перац;
• 4–6 лісткоў парэчкі;
• 2–4 лісткі вішні;
• 1 сярэдні лаўровы ліст;
• 4–5 гарошын духмянага перцу;
• 8–10 гарошын чорнага перцу;
• 2–3 парасончыкі кропу;
• 1 сярэдняя морквіна;
• 1 сярэдняя цыбуліна;
• 1 сярэдняя галоўка часнаку.

Марынад на 1,5 л вады:

• 2 ст. л. солі;
• 5 ст. л. цукру;
• 3 ст. л. 9%-га воцату.

Як гатаваць:

1. Агародніну мыем. Кабачкі наразаем паўколамі, моркву — тоўстай саломкай, капусту і перац – доўгімі лустачкамі памерам з кавалачак кабачку, памідоры і фасолю пакідаем цэлымі.
2. Накладваем у слоік падрыхтаваную агародніну, між ёй кладзем лісце. Заліваем кіпнем хвілін на 10–15.
3. Зліваем ваду са слоіка, дадаем да агародніны соль, цукар і воцат. Заліваем свежым кіпнем.
4. Закатваем, пераварочваем слоікі і накрываем ручнікамі да таго моманту, пакуль закаткі не астынуць. Пасля адпраўляем на захоўванне ў прахалоднае цёмнае месца.

Што ўзяць:

• 400 гр кабачку;
• 1,5 шклянкі мукі;
• 0,8 шклянкі цукровай пудры;
• 180 гр масла;
• 200 гр натуральнага ёгурту;
• 1 яйка;
• 2 ст. л. какосавай стружкі
• 1 ч. л. натуральнага ванільнага цукру, калі ёсць;
• 1 ч. л. разрыхляльніку;
• 0,5 ч. л. карыцы;
• сок двух лімонаў і 1 апельсіна;
• соль.

Як гатаваць:

1. Растопліваем масла, крыху астужаем і змешваем з ёгуртам. Узбіваем яйка з 0,5 шклянкі пудры да пышнай масы. Змешваем яе з ёгуртавай сумессю, ванільным цукрам і какосавай стружкай.
2. Муку прасейваем з разрыхляльнікам і, увесь час перамешвая, засыпаем яе ў нашую вадкую сумесь.
3. Кабачок чысцім ад лупіння і насення, 1/3 кабачка адкладваем. Астатні націраем на буйную тарку, крыху прысыпаем соллю і пакідаем на 20 хвілін. Пасля добра
   адціскаем і дадаем гародніну ў цеста.
4. Духоўку трэба разагрэць да 180 градусаў. Сіліконавую форму апырскваем вадой і перакладваем у яе цеста. Выпякаем каля гадзіны (правяраем зубачысткай – яна мусіць быць крышачку вільготнай). Кекс ужо можна есці, але калі ёсць жаданне, можна зрабіць выпечку больш святочнай.
5. Наразаем кубікам рэшту кабачка.
6. Гатуем сіроп: 0,3 шклянкі пудры распускаем у 0,45 л вады. Дадаем лімонны і апельсінавы сок, карыцу — і даводзім да кіпення. Варым, памешваючы, 20 хвілін.
7. Дадаем кабачок і тушым на маленькім агні каля 10 хвілін. Даем крыху астудзіцца.
8. Выкладваем кекс на талерку, праколваем выпечку шпажкай і паліваем яшчэ цёплым сіропам. Даем прапітацца хвілін 30 — і з асалодай частуемся.

Што ўзяць:

• малады кабачок;
• паляўнічыя кілбаскі;
• чырвоны/ каенскі перац/ вострая папрыка;
• чырвоная цыбуля;
• аліўкавы алей;
• соль;
• доўгія драўляныя шпажкі.

Як гатаваць:

1. Замочваем шпажкі ў гарачай вадзе на 30 хвілін.
2. Кабачок наразаем тонкімі падоўжнымі слайсамі, пасыпаем соллю, апрыскваем алеем і пакідаем хвілін на 15.
3. Кілбаскі прыпраўляем чырвоным перцам, цыбулю наразаем на долькі.
4. Па чарзе насаджваем на шпажку інгрэдыенты: кабачок, цыбуля, кілбаска, кабачок і г. д. Кабачок мусіць «абдымаць» кілбаску і цыбулю, як змейка. На кожную шпажку йдзе па адным слайсе кабачка.
5. Кладзем шпажкі на рашотку ці разагрэтую патэльню і абсмажваем з кожнага боку па пару хвілінаў. Ужываць можна як у гарачым, так і ў халодным выглядзе.