Хто мы і чаго хочам

Мы – беларусы, тыя, хто з’ехалі і засталіся, нашае галоўнае жаданне – свабодная краіна, росквіт і незалежнасць. Перамога страху і няўпэўненасці, захаванне сілаў і моцы для здабыцця сваёй мэты.

Пра што нашыя тэксты

Пра тое, каб перастаць адчайвацца і пачаць дзейнічаць у межах сваіх магчымасцяў. Нашыя палітвязні танчаць за кратамі і малююць на нарах, спрабуюць забіць сябе ў зале суда і абвяшчаюць галадоўкі. І нам не час ненавідзець адно аднаго і шкадаваць сябе. Наша мэта – аб’яднацца і рабіць сваю справу, на фінішы ў нас – Беларусь.

Мы пераконваем перастаць злавацца на тых, хто робіць не так, кажа і посціць не тое, на тых, хто публічна радуецца і публічна крытыкуе, на тых, хто дае парады, на тых, хто песіміст, на тых, хто аптыміст, на тых, хто “я вас папярэджваў”, на тых, хто “ўсё прапала”, на тых, хто не падтрымаў, на тых, хто з’ехаў, і на тых, хто застаецца.

Хто мы і чаго хочам

Бо мы ўсе – адно цэлае. Мы адчулі сябе гэтак, магчыма, упершыню, у крывавым 2020, і ніхто не адбярэ ў нас гэтага, бо мы – адзін народ.

Нашыя тэксты – пра дапамогу, узаемадзеянне, абмен досведам і бязмежную любоў да Радзімы.

Як быць сойкай

Пішыце нам, прапаноўвайце, выпраўляйце і дапаўняйце. Інфармуйце сяброў і блізкіх, калі нашыя тэксты аказаліся карыснымі. Пашырайце і нясіце ў дзюбе, раздаючы пранізлівы крык па ўсім лесе.

Сойка – птушка-партызан

Сойка – птушка-партызан.

Селіцца ў лясах, лётае, амаль не датыкаючыся да зямлі. Пераносіць інфармацыю ад галіны да галіны. Хітрая і дзёрзкая, часам бясстрашная, першая абвяшчае пра небяспеку і прысутнасць чужынца. Гаворыць на мове, зразумелай усім птушкам лесу.

Закопвае жалуды да вясны. Часам забывае пра свае схованкі, і з іх вырастаюць маладыя дубы. Розум соек мацнейшы за інстынкт, размах крыла – 50 см.