Варэнне варэння: 5 рэцэптаў гурманскага сочыва

Для прыгатавання гэтага ласунку спатрэбіцца няшмат рухаў, але шмат часу: 15 хвілінаў на падрыхтоўку, 15 хвілінаў на прыгатаванне і больш за содні на настойванне.
Ружы выкарыстоўваем толькі з уласнай ці сяброўскай клумбы: кветкі з крамы апрацоўваюцца хіміяй, таму не рызыкуйце здароўем.

Што ўзяць:

• 150 гр пялёсткаў ружаў;
• 1 кг цукру;
• 250 мл вады;
• стручок ванілі;
• сок аднаго лімона.

Як гатаваць:

1. У пялёсткаў выдаляем белыя і пажоўклыя часткі. Добра прамываем халоднай вадой.
2. Засыпаем пялёсткі 5–6 ст. л. цукру і пакідаем усё гэта на 7–8 гадзін.
3. Разразаем стручок ванілі і акуратна здымаем мякаць нажом. Гатуем сіроп з цукрам і мякаццю ванілі. Дадаем у яго лімонны сок і зацукраваныя пялёсткі.
4. Варым сочыва на малым агні 10 хвілін, а затым пакідаем яго на содні. Пасля раскладваем духмяную слодыч па стэрылізаваных слоіках, шчыльна закручваем і захоўваем у цёмным месцы.

Што ўзяць:

• 2 кг зялёных яблык кшталту антонаўкі ці грэні сміт;
• 4 лімоны сярэдняга памеру;
• 4 палачкі карыцы;
• 0,5 ч. л. молатага шафрану;
• 1,5 л вады;
• цукар – у залежнасці ад колькасці атрыманай вадкасці падчас прыгатавання – 400 гр на 0,5 л.

Як гатаваць:

1. Садавіну наразаем з лупінай, косткамі і сарцавінай. Лімоны можна здрабніць у блэндары – трэба, каб яны былі дробна парэзаныя.
2. Кладзем садавіну ў рондаль, дадаем разламаныя палачкі карыцы і заліваем усё вадой. На моцным агні даводзім да кіпення, потым варым пад накрыўкай 1,5 гадзіны на самым павольным агні, перыядычна памешваючы.
3. Высцілаем марляй вялікі рондаль ці таз, адкідваем туды яблычную масу. Завязваем канцы так, каб атрымаўся мяшэчак, які мы падвесім над рондалем на 10–12 гадзін. Не адціскаем!
4. Вымяраем колькасць вадкасці, затым змешваем яе з цукрам.
5. Дадаем шафран, даводзім да кіпення на невялічкім агні, памешваючы і здымаючы пенку, да загусцення – прыкладна 15 хвілінаў. Раскладваем гарачае жэле па стэрылізаваных слоіках, закручваем і ахалоджваем.

Гэтую незвычайную садавіну ўпершыню знайшлі ў Бразіліі. Назвалі яе ў гонар дырэктара мясцовага музея Жуао дэ Фейхо.

Што ўзяць:

• 1 кг фейхоа;
• 500 гр яблык без скуркі;
• 750 гр цукру;
• 1 лімон.

Як гатаваць:

1. Фейхоа прамываем, адразаем кончыкі і праколваем плады ў некалькіх месцах.
2. З лімона акуратна здымаем цэдру, не закранаючы белай «ваты».
3. Яблыкі націраем на дробнай тарцы, выкладаем іх у вялікі рондаль, паліваем сокам лімону, дадаем цэдру і цукар. Зверху кладзем фейхоа.
4. Варым нашае смарагдавае хараство на сярэднім агні. Перыядычна памешваем і здымаем пенку. Праз гадзіну выключаем агонь і накрываем рондаль ручніком, пакідаем на ноч.
5. Прыгатаванае сочыва раскладваем па стэрылізаваных слоіках. Захоўваем у халодным цёмным месцы.

Што ўзяць:

• 1 кг журавінаў;
• 1,5 кг цукру;
• 600 мл вады.

Як гатаваць:

1. Ягады перабіраем, асцярожна (каб не падавіць) прамываем, крыху абсушваем.
2. Адкідваем журавіны ў друшляк і на 3–4 хвіліны апускаем у ваду, якая кіпіць.
3. Гатуем сіроп з вады, у якой бланшавалі ягады, і дадаем у яго журавіны. Варым на сярэднім агні да гатоўнасці.
4. Гарачае сочыва раскладваем па прагрэтых слоіках.

Што ўзяць:

• 1 кг ігруш вільямс;
• 2 вялікія памяранцы;
• 650 гр цукру;
• 20 гр пектыну;
• 2 стручкі ванілі.

Як гатаваць:

1. Ігрушы разразаем уздоўж, выдаляем сарцавіны. Наразаем мякаць невялічкімі долькамі так, каб на кожнай з іх была лупіна. Дадаем прыкладна чвэрць цукру і пакідаем на гадзіну.
2. З памяранцаў здымаем цэдру, выціскаем сок.
3. У рондалі змешваем цукар, сок і 4–5 ст. л. вады. На сярэднім агні даводзім да кіпення, варым 3 хвіліны.
4. Дадаем у рондаль ігрушы з цукрам, на моцным агні зноўку даводзім да кіпення, здымаем пенку і выключаем агонь. Пакідаем на дзве гадзіны. Паўтараем тыя ж дзеянні з давядзеннем да кіпення і астываннем на працягу дзвюх гадзінаў яшчэ два разы.
5. Перад апошнім праграваннем кладзем у сочыва цэдру, мякаць ванілі і яе разрэзаныя стручкі.
6. Пасля апошняга астывання ставім сочыва на моцны агонь, дадаем пектын, даводзім да кіпення і варым 2–3 хвіліны.
7. Гарачае сочыва разліваем па слоіках, даем цалкам астыць і толькі тады закручваем.