Як падрыхтавацца перасякаць беларускую мяжу

Існуе спіс рэчаў, якія нельга правозіць ні праз адну мяжу любой дзяржавы. Гэта незарэгістраваная зброя, наркотыкі, вялікія суммы наяўных грошаў і гэтак далей. Але ў Беларусь і з Беларусі лепш НЕ ВАЗІЦЬ з сабой і наступныя, на першы погляд, нявінныя рэчы:

• любую «экстрэмісцкую» прадукцыю: кнігі, часопісы, газеты, налепкі, сцяжкі, сімволіку і г.д.
• фота- і відэатэхніку ў вялікім аб’ёме (дзве камеры, тры аб’ектывы і г.д.)
• хімічныя рэчывы
• вопратку і прадметы белага і чырвонага колеру
• цацкі для дарослых

Калі існуе імавернасць, што вы можаце выклікаць цікавасць сілавікоў, лепш задэкларуйце дарагую тэхніку, якую вы перавозіце праз мяжу. Нават калі яна вашая і была ў выкарыстанні. Захоўвайце дэкларацыю падчас усёй паездкі!

Гаджэты — самае ўразлівае месца сучаснага чалавека, асабліва, калі даводзіцца сутыкацца з тымі, хто ведае, што і дзе яны хочуць знайсці. Памятайце, што на мяжы ў вас могуць:

• праверыць падпіскі ў Telegram, YouTube, Facebook, Instagram
• прагледзець гісторыю паведамленняў у мэсэнджарах
• праверыць фотаздымкі ў тэлефоне
• прагартаць пошту (і нават інфармацыю на гугл-дыску)
• праверыць асабістыя дадзеныя на старонках у сацыяльных сетках
• часам нават наяўнасць аплікацыі VPN на смартфоне можа выклікаць пытанні

Як абараніць свае гаджэты ад непажаданай увагі, вы можаце прачытаць у нашым гайдзе. І памятайце, што цікавіцца сілавікі могуць не толькі смартфонамі, а лаптопамі, планшэтамі і нават смарт-гадзіннікамі.

Сёння на гутарку могуць выклікаць любога чалавека незалежна ад палітычнага бэкграўнду. Таму варта быць маральна падрыхтаванымі да таго, што менавіта вашая асоба будзе абраная для размовы з сілавікамі тэт-а-тэт.

У такой сітуацыі памятайце:

• Не хвалюйцеся, наколькі гэта магчыма. Размова не роўная затрыманню.
• Не хаміце, гэта само па сабе можа стаць нагодай для адміністрацыйнага працэсу.
• На жаль, не спрабуйце апеляваць да закона, высвятляць імёны, пасады і падставы для гутаркі. Як бы дзіка гэта ні гучала, але гэта можа нашкодзіць.
• Вядома, кожны вырашае сам, аднак лепей не згадваць пра свой грамадзянскі або палітычны досвед. Хадзілі на маршы? Данацілі на полк Каліноўскага ці на патрэбы ЗСУ? Лепей адказваць «не» без падрабязнасцяў.
• Будзьце акуратныя з хлуснёй. Калі вас пытаюць, напрыклад, ці знаёмыя вы з тым ці іншым чалавекам, і ваш адказ па праўдзе мусіць быць станоўчым, лепш адказаць, што не памятаеце, чым адмаўляцца ад фактаў.
• Не кажыце, што візу вам рабілі пры дапамозе міжнародных праваабарончых арганізацый.
• Майце гатовыя нейтральныя адказы на верагодныя пытанні: «Што рабілі ў 2020 годзе? Ці падтрымліваеце вайну?»

Памятайце: нават калі вы маеце грамадзянства іншай краіны, акрамя беларускага, яно можа не абараніць вас ад рэпрэсіяў. Узгадайце кейс палітзняволенай Наталлі Хершэ, якая мела беларускае і швейцарскае грамадзянства і ўсё роўна атрымала тэрмін у калоніі.

Замежны від на жыхарства не толькі не дае дадатковай абароны, а наадварот, можа нашкодзіць. Лепш увогуле не вазіць у Беларусь такія дакументы, як, напрыклад, студенцкі білет ЕГУ.

Людзі, якія ніколі не мелі беларускага грамадзянства, таксама не ў стоадсоткавай бяспецы. У апошнія месяцы СМІ паведамлялі пра спробы беларускіх спецслужбаў завербаваць замежнікаў. Таксама з імі праводзяць гутаркі і часам ім адмаўляюць ва ўездзе ў краіну.