Далі цяпло! Сезонныя рэчы ад беларускіх дызайнераў

Шалікі, гарсэткі-камізэлькі, світшоты і паясныя торбы з вышыўкай паводле матываў маляваных дываноў Алены Кіш робіць брэнд з назвай «Мой родны кут». Амаль не жартуем: чакаем утульных камізэлек з гадзілай Осіпава.

Дызайнерка Наста Васючэнка робіць адметныя хусткі з кнопачкамі і цёплыя рукавіцы з арганзой, якія цудоўна спалучаюцца са звычайным пухавіком.

Майстрыца Стася вяжа свае павуцінкі, рассылае іх па свеце і абяцае навучыць вязаць кожнага. У профілі знойдзеце бамбезныя кардыганы ў краткі, воблачкі, дзірачкі, паскі ды грыбочкі.

Швэдры з фантазійнымі малюнкамі і яркія кардыганы з чэлесамі — хайлайты дызайнеркі Святланы Станкевіч.

Утульныя байкі і касцюмы з крылцамі на спіне, роднымі фразамі і анёлкамі ад Такі Закі.

Саматканыя шалікі ад ткачыхі і стваральніцы майстэрні «Ярна» Наталлі Ярмалінскай.

Сучасныя галаўныя ўборы — шапкі, каптуры і камінаркі (балаклавы здаровага чалавека) — стварае сямейны брэнд мамы і дачкі Watek.

Світшоты і сукенкі са схаванымі зашпількамі для груднога гадавання немаўляці, з кішэнямі і вышыўкай — гэта ўсё цеплыня ад tikotaunique.

Брэнд «Вокладкі» пачаў ствараць адзенне — цёплыя світшоты з яшчэ цяплейшымі прынтамі.

Яркія швэдры, шырокія, але нядоўгія — самы актуальны крой на гэтую зіму.

Вязаныя рукавічкі з адметным дэкорам ад майстрыцы Марысі Лось.

Вязаныя тэпцікі ад сямейнага брэнда mamas_taptis.

Павязкі, шапкі і пледы буйной вязкі стварае майстрыца Алена Ваўковіч.

Рукавічкі, міценкі, шкарпэткі, шалікі, сукенкі, кардыганы, шапкі і тэпці — тут можна знайсці цёплую і ўтульную вязаную рэч на свой густ.

Рэчы ад брэнда «Хмарачос» любяць за іх фразачкі, вышытыя на шапках, байках і цішотках.

Цёплыя рэчы з вышыўкай з сюжэтамі мастацтва ад брэнда «Гонар».

Майстрыца Хахатуша працуе з лямцам і стварае з воўны ўтульныя рэчы і карціны з партрэтамі жывёлаў.

Ваўняныя тэпцікі, джэмперы, шалікі і рукавічкі ручной работы стварае Вольга, аўтарка брэнда Hiwool.

Ажурныя шалі, паланціны і кардыганы вяжа пруткамі майстрыха Аксана.

Ірына Рынкевіч вяжа рукавічкі з воўны вярблюда і мерыноса.

Каб вы не адмарозілі ногі, майстрыца Святлана Бохан вяжа шкарпэткі з карункамі і мумітролямі.

Вольга Туркова стварае лямцавыя тэпці і рукавічкі з цікавымі сюжэтамі.

Майстрыца Вольга Старавойтава вяжа шкарпэткі з арнаментамі і рукавічкі з коцікамі, а таксама міценкі і напульснікі.