У сераду аматараў літаратуры запрашаем на сустрэчу з Ганнай Янкутай ды Ігарам Крэбсам! Ігар Крэбс прадставіць два новыя выданні з серыі «Гебраістыка Беларусі», якія нядаўна выйшлі ў Мінску (выд. Р. Цымбераў):
– Тэадор Герцль «Старая новая зямля»: утапічны раман, у якім прапануецца падыход да рацыянальнага і абачлівага выбудоўвання дзяржавы і ўсіх дзяржаўных інстытутаў «з нуля». Раман у свой час натхніў людзей на стварэнне Ізраіля. Супадзенне з назвай паэмы Якуба Коласа «Новая зямля» не выпадковае: творы з’явіліся ў адну эпоху і адлюстроўваюць агульны дух часу, імкненне да самавызначэння і пошуку месца ў свеце, якое можна будзе з пэўнасцю назваць «сваім».
– Генрых Гайнэ «Габрэйскія мелодыі»: цыкл вершаў нямецкага класіка, прысвечаны габрэйскай тэматыцы. Вершы суправаджаюцца грунтоўнай прадмовай і каментарамі біблеісткі, кандыдата філалагічных навук Галіны Сінілы.
Ганна Янкута прадставіць (эка)паэтычны праект «Геалогія»/«Канстытуцыя», які з’яўляецца асэнсаваннем беларускіх падзей 2020 года праз прызму галоўнага беларускага закона, які пастаянна парушаецца рэжымам, а таксама спробай супаставіць дзве з’явы – палітычную дыктатуру і дыктатуру антрапацэну. «Геалогія» і «Канстытуцыя» – гэта адна і тая ж кніга, якая па-рознаму была надрукаваная ў Мінску і ў Польшчы. Тэмы, пра якія таксама будзем пагаварыць, – гэта паэзія і цэнзура, мова, змены ў грамадстве.
Любое размяшчэнне матэрыялаў на іншых рэсурсах неабходна ўзгадняць з праваўладальнікамі.
Па ўсіх пытаннях звяртайцеся на sojka.editors@gmail.com