Малюнак Ксеніі Лагавой
Мы ходзім у бары, кавярні і на вечарынкі, каб добра прабавіць час, сустрэцца з сябрамі, выпіць, паесці, завесці новыя знаёмствы. На жаль, часам месцы агульнага свята для некоторых ператвараюцца ў пляцоўку для палявання. І так, сяброўка, мы ўсе згодныя, што ў аб’юзе і гвалце заўжды вінныя аб’юзер і гвалтаўнік. Але дрэнныя людзі існуюць. Яны не носяць шпіёнскіх капялюшоў і не выдаюць сябе злодзейскім смехам. Вось, што падказвае бармэнскі досвед.
- Мы жывем у свецкай дзяржаве, дзе ўсе могуць выбіраць адзежу на ўласны густ. Кароткая ці доўгая, джынсы ці спадніца — мы маем права насіць усё. Той, хто мае намер зрабіць шкоду іншаму чалавеку, не зважае на адзенне. А вось абутак лепш абіраць зручны, без высокіх абцасаў і складаных засцёжак. Калі ты стомішся, захочаш патанчыць ці раптоўна будзеш няцвёрда трымацца на нагах — такое здараецца з людзьмі, — зручны абутак дапаможа. А яшчэ ты куды хутчэй перасоўваешся ў зручным абутку. Павер, перад вачыма бармэнаў пралятала столькі абсалютна цвярозых дзяўчат, якія не ўтрымаліся на высокіх абцасах і ў найлепшым выпадку разам з раўнавагай руйнавалі вобраз, а ў горшым — ехалі ў проста шпіталь.
- Цябе пужалі ў дзяцінстве паходам «за гаражы»? Некаторыя публічныя ўстановы, на жаль, маюць не найлепшую рэпутацыю, і іх сапраўды лепей пазбягаць. Калі цябе клічуць у няўцямнае месца ў стрэмным раёне, за горад ці ў іншае цяжкадаступнае месца, відаць, трэба добра ўзважыць за і супраць. Здарыцца ў жыцці можа што заўгодна, таму лепей заўжды звяртаць увагу на тое, ці ёсць мабільная сувязь, наколькі лёгка дабрацца да транспарту і колькі людзей навокал. Не палянуйся, пагуглі загадзя, куды ідзеш.
- Калі сабралася ехаць, то паведам каму-небудзь, куды ты ды з кім. Найлепш — блізкім людзям. Нават узгадка ў сацсетках не будзе лішняй ці празмернай.
- І вось ты, прыгожая і вясёлая, дабралася туды, куды прагнула, сустрэлася з сяброўкамі, і вы радасна бавіце час. Добра, калі вы будзеце разам увесь вечар і сыходзіць таксама будзеце адначасова. Асабліва, калі нехта перабраў з алкаголем.
- Дарэчы, не забывай пра свой напой. Не важна, п’еш ты газіроўку, каву, віно ці гарэлку. Не пакідай яго без увагі, бо нават самы сімпатычны і мілы вонкава чалавек можа падсыпаць нешта. Гэта куды больш пашыраная практыка, чым падаецца на першы погляд. Таму і «падарункавыя» дрынкі лепш не прымаць, калі толькі іх наўпрост табе ў рукі не перадае бармэн. Дарэчы, кажуць, што некаторыя транквілізатары (менавіта іх часцей за ўсё выкарыстоўваюць для таго, каб атруціць некага) маюць характэрны прысмак. Не пі залпам, спяшацца няма куды.
- Настойлівыя знаёмствы — непрыемная сітуацыя. І адкрытая агрэсія, і празмерная сціплаць могуць быць не найлепшымі стратэгіямі. Лепш цвёрда сказаць: «Не». Часам працуюць словы пра хлопца ці мужа. Можна звярнуцца да ахоўніка, бармэна, афіціянтаў па дапамогу. Часцей за ўсё гэтага хопіць, каб адвадзіць непажаданага лавеласа. Але будзь уважлівая, асабліва на вуліцы.
- Не саромся падымаць шум, калі адчуваеш небяспеку. Лепей выглядаць дзіўнай, чым пацярпець.
- Калі свята скончылася і вы збіраецеся раз’язджацца, не варта сыходзіць з новымі знаёмымі. Тым больш адной. Перанясіце сустрэчу на іншы дзень. І як дамаўляліся вышэй — калі разам прыйшлі, то разам і сыходзьце. Упэўніцеся, што ніхто не зстаўся «за бортам», асабліва ў нецвярозым стане.
- Дамоўцеся напісаць ці пазваніць адна адной ці блізкім, калі сядаеце ў начную таксоўку. І, безумоўна, не бяры папутку, гэта заўжды вельмі небяспечна.
Добрых людзей больш, чым дрэнных, але берагчы сябе — нармальна, адказна і сучасна.
Спадабаўся матэрыял? Падзяліся з сябрамi!
