Гiды

Найлепшыя беларускія інстамагі

Найлепшыя беларускія інстамагі

Беларускія часопісы, якія можна чытаць у інстаграме

Інстаграм — гэта даўно не толькі фота сняданкаў ды сэлфі з прыгламуранымі маскамі. Тут поўна відэа і нават карысных, змястоўных часопісаў. Сойка сабрала інстанабор беларускіх магаў, на якія варта падпісацца ўжо зараз. Глядзім, чытаем, натхняемся.

Chrysalis Mag

Ваша дзённая порцыя беларускага мастацтва. Часопіс, які стварыла вядомая мастачка Надзея Макеева, якая сёння жыве і працуе ў ЗША. Chrysalis Mag пазіцыянуе сябе як сацыякультурны праект і рухомае міжнароднае аб’яднанне беларусаў, так ці інакш звязаных з мастацтвам. Падпісаўшыся, вы атрымаеце падборкі актуальных працаў беларускіх мастакоў, пачытаеце, чым яны жывуць, у якіх умовах ствараюць свае працы.


@adamov.adamau — «Камісія па вяртанні дадому» / @vik_meh

Аловакмаг

Пяшчотнае беларускамоўнае выданне — таксама пра мастацтва, але больш пра прыкладную творчасць, рамеснікаў, ілюстрацыю. Аўтары паведамляюць, што аб’ядноўваюць аматараў і аўтараў ручной работы, распавядаюць пра крафтавыя падарункі. На «Аловакмагу» знаёмяць з мастачкамі, кавалямі, дызайнеркамі, стылісткамі, фатографкамі і іхнымі творамі.

Пакрысе

Інстаграм-часопіс, з якім можна пакрысе, без стрэсу пераходзіць на беларускую мову, памалу засвойваючы словы і правілы, чытаючы гісторыі паспяховай беларусізацыі, якую ўжо правялі ў сваім жыцці іншыя людзі.

Сойка

Янка Купала спытаў «Што ж рабіць?» — а Сойка адказвае. Адзіны беларускі часопіс, які займаецца журналістыкай рашэнняў. Мы бярэм пытанні і экспертаў, а атрымліваюцца невялікія ёмістыя гайды для ўсіх выпадкаў жыцця, у якіх апынаецца сённяшні беларускі чалавек. Ад тлумачэнняў пра з’явы — да практычных парадаў. Разам з намі вы вывучыце беларускую, даведаецеся, куды і на чым ехаць (і як там разлічвацца), што чытаць, як вучыцца і як забаўляцца. Далучайцеся да самай траскучай птушкі ў лесе!

Годна

Інстаграм моладзевай грамадскай кампаніі «Годна», якая займаецца папулярызацыяй беларускай мовы і грамадзянскай актыўнасці. Заснаваў «Годна» Павел Белавус, які сёння знаходзіцца за кратамі, а ягоныя паплечнікі працягваюць справу. У інстамагу кампаніі распавядаюць пра выбітных асобаў, праводзяць марафоны, вучаць гатаваць беларускія стравы і анансуюць новыя выпускі каманды на ютубе.