Лета на талерцы: 6 дэсертаў ад беларускіх кухараў

Сэміфрэда з ягадамі ад Smačnaja Mova

Што ўзяць:

•  500 мл вяршкоў 35%
• 180 гр цукру
• 5 яечных жаўткоў
•  1 ст.л. жэлаціну
•  100 гр малінаў
• 100 гр ажынаў
• 200 гр трускавак або чарніцаў (для каляровага слою)
• жменя фісташак
• 100 гр улюбёнага печыва ці дамскіх пальчыкаў (Саваярдзі)

Як гатаваць:

1. Вяршкі ўзбіць міксерам с паловай цукру (90 гр) да густаты. Паставіць у лядоўню. Жаўткі злучыць з рэштай цукру, узбіць венчыкам і паставіць на вадзяную лазню, працягваючы ўзбіваць, пакуль жаўткі не загусцеюць і не стануць гарачымі (але не даводзьце да кіпення). Пасля ўзбіць, пакуль не павялічацца ўдвая ў аб’ёме. Злучыць жаўткі з вяршкамі, добра перамяшаць.
2. У невялікім рондалі злучыць жэлацін з 3 ст.л. вады. На сярэднім агні мяшаць, пакуль ён не растопіцца і не закіпіць. Потым дадаць у вяршкі, перамяшаць. Аддзяліць 1/4 частку вяршкоў. Трускаўкі або чарніцы ўзбіць блэндарам у пюрэ і злучыць з гэтымі вяршкамі, атрымаецца каляровая маса.
3. Форму для сэміфрэда (можа быць звычайная для кекса-хлеба) заслаць плёнкай. Выліць палову белых вяршкоў, зверху — маліны, ажыны і фісташкі, а на іх — астатнія вяршкі, і пасля — печыва. І зверху заліце ўсё каляровымі вяршкамі. Накрыйце плёнкай і пастаўце ў маразільню на 8-10 гадзін.

Тарт са слівамі ад Годны кекс

Што ўзяць:

• 200 гр мукі
• 100 гр халоднага масла
• 30-50 гр цукру
• 1 яйка
• Соль
• 2-3 ст.л. халоднай вады
• 500 гр сліваў
• Карыца або іншыя спецыі
• Трошкі кукурузнага крухмалу

Заўвагі:

• Цеста можна рабіць без цукру або дадаць на свой густ.
• Спецыі можна выкарыстоўваць таксама на свой густ: карыца, імбір, гваздзіка, кардамон або іх сумесь.
• Слівы па жаданні можна пасыпаць зверху цукрам, калі не любіце кіславатыя ягады і садавіну ў выпечцы.

Як гатаваць:

1. Муку, цукар, соль і масла перацерці ў крошку, рукамі або блэндарам. Дадаць яйка. Размяшаць. Уліць ваду. Хутка замясіць цеста. Пакласці ў пакеце ў лядоўню.
2. Са сліваў дастаць костачкі і нарэзаць на чацвярцінкі.
3. Цеста расцягнуць, утвараючы невялікія борцікі, па форме, змазанай маслам. Прысыпаць кукурузным крухмалам.
4. Выкласці слівы. Зверху пасыпаць спецыямі.
5. Выпякаць 40 хв пры 180 градусах. Наразаць лепш цёплым ці халодным (не гарачым), каб трошкі застыў сок ад сліваў.

Ягадны крамбл ад yana_kavaliova (vegan)

Што ўзяць для начынкі:

• 500 гр свежых ягад (дурніцы+парэчкі+маліны ці іншыя)
• 1 персік/банан або пара сліў
• 3 ст. л. сіропу тапінамбуру / карычневага цукру
• 1 ст. л. соку цытрыны

Наразаем персік ці банан кубікамі. Змешваем ягады, садавіну, сіроп/цукар і сок цытрыны. Паступова выкладваем у шкляную/керамічную форму.

Для цеста:

• Фундук 40 гр
• Рысавая мука 50 гр
• Мука з зялёнай грэчкі 50 гр
• Какосавы алей нерафінаваны 40 гр
• Сіроп тапінамбуру 3 ст. л.

Як гатаваць:

1. Фундук злёгку абсмажваем на сухой патэльні і па магчымасці чысцім. Дробна мелем у кавамолцы.
2. Змешваем у місцы рысавую і муку з зялёнай грэчкі, какосавы алей і сіроп.
3. Дадаем фундук і расціраем цеста рукамі. Атрымліваецца рассыпістая крошка.
4. Гэтай крошкай раўнамерна пасыпаем ягадны пласт.
5. Выпякаем 20 хвілін на 180 градусах або пакуль ягады не дадуць сок, а скарыначка зарумяніцца.
6. Раскладваем па талерках або ямо лыжкай адразу з формы.

Галета з персікамі і клубніцамі ад greenmom_in_the_kitchen (без глютэну)

Што ўзяць для цеста:

• 400 мл мукі (у роўных частках — нутавай, аўсянай, пшоннай, выбірайце 2 ці 3 гатункі)
• 200 мл кіпню
• 1 ст.л. сіропа тапінамбуру
• 1 ст л. урбечу (напрыклад, кунжутнага)
• ½ ч.л. соды (лепей арганічнай)
• 1 ст.л. лімоннага соку

Для начынкі:

• 7-8 ч.л. насення чыа
• 4 персікі
• Клубніцы

Як гатаваць:

1. Прасеяць муку і перамяшаць з содай. Заліць кіпень, сіроп, урбеч, лімонны сок і замясіць цеста. Пры неабходнасці дадаць яшчэ крыху мукі. Скатаць цеста ў шар і пакінуць у лядоўні на 30 хвілін.
2. Раздзяліць цеста на тры-чатыры роўныя часткі. Раскачаць кожную частку ў круг таўшчынёй 5 мм.
3. У сярэдзіну круга насыпаць тонкім слоем насенне чыа. Яно будзе ўбіраць у сябе сок ад ягад і садавіны. Зверху выкласці ачышчаныя і нарэзаныя долькамі персікі і нарэзныя клубніцы. Па жаданні прысыпаць какосавым цукрам ці паліць сіропам тапінамбуру (альбо паліць гатовую галету мёдам).
4. Выкладваць начынне трэба так, каб застаўся свабодны край цеста прыкладна ў 3 см. Заляпіць край галеты і выпякаць у духоўцы 20 хвілін на 200 градусах.

Ягадны ёгурт з зялёнай грэчкі ад zavtrak_s_veganom (vegan)

Што ўзяць:

• 5 ст.л. загадзя замочанай/прарошчанай зялёнай грэчкі
• 50 мл расліннага малака (без цукру і кансервантаў)
• 2 ст.л. молатага насення льну
• банан
• кубак свежамарожаных ягад/садавіны

Як гатаваць:

1. Зялёную грэчку загадзя варта прамыць і замачыць на 2-3 гадзіны.
2. У блэндар кладзем грэчку, насенне льну, свежамарожаныя ягады/садавіну, расліннае малако, банан.
3. Старанна ўзбіваем. Кансістэнцыю рэгулюем з дапамогай малака.

Ружовы смузі-боўл ад Alesia Footblog

Што ўзяць:

• 200 гр сметанковага сыру
• 300 гр + жменя малінаў
• 5 шт трускавак
• Жменя дурніцаў
• Мята

Як гатаваць:

1. Адпраўляем у блэндар сметанковы сыр і 300 гр малінаў — блэндзім да стану мусу, выкладаем у міску.
2. Дадаем нарэзаныя трускаўкі, дурніцы і пару малінаў.
3. Упрыгожваем мятай.