Якасці спаржы
- Нізкая каларыйнасць — 18 ккал на 100 гр.
- 100 актыўных кампанентаў, якія ўзмацняюць арганізм, між іх: вітамін K, фоліевая кіслата, амінакіслоты, клятчатка, вітаміны групы B, вітамін А, C і E.
- Біялагічна актыўнае рэчыва глутатыён: разбурае ракавыя клеткі, затрымлівае развіццё хваробы Альцгеймера, дае моцны антыаксідантны эфект.
- Дзейнічае як прэбіётык, стымулюе працу добрых бактэрыяў і стрававальную сістэму.
- Мае мачагонны эфект і змяняе пах мачы (не здзіўляйцеся).
Дзе набыць у Беларусі
Яшчэ нядаўна аспарагус быў прадуктам з каралеўскага ды рэстараннага меню, але сёння спаржу вырошчваюць і на масавую замову. У беларускіх супермаркетах можна сустрэць такую прадукцыю:
- Спаржа «Ля нёмана» — фермерская гаспадарка ў Стоўбцаўскім раёне, якую стварыла пара былых айцішнікаў. Вырошчваюць зялёную спаржу, якую можна замаўляць ужо зараз. Як падрастаюць пучкі, можна сачыць у інстаграме ледзь не ў рэальным часе. Гэтую спаржу можна будзе сустрэць у менскіх крамах.
- Спаржа «Сула» сямейная фермерская гаспадарка, якая вырошчвае белую спаржу і бульбу. Каб даведацца пра пачатак продажу, раяць падпісвацца на інстаграм і сачыць за абнаўленнямі. Там жа, дарэчы, бываюць і рэцэпты, як прыгатаваць карысную агародніну.
Як гатаваць спаржу
Аспарагус універсальны і вядомы тым, што робіцца гатовым да ўжывання ўсяго за пару хвілінаў: гатуецца на пліце, у духоўцы, на вогнішчы або грылі. Свежыя парасткі можна таксама ўжываць сырымі. Зялёная спаржа гатуецца вельмі хутка, аднак фіялетавая і белая больш мясістыя па кансістэнцыі і патрабуюць даўжэйшага часу прыгатавання.
Луі XIV (у нас больш вядомы як Людовік XIV) найбольш любіў аспарагус з адкрытага агню, як дадатак да свежаспечанага труса, але мы можам гэтак не запарвацца, а проста патрымаць пучкі на пары або пасераваць, каб выкарыстаць як гарнір, дадаць у крэм-суп ці салату. Абсмажаны аспарагус будзе дасканалай начынкай для пірага ці тарта.
Парады ад блогеркі Greenmom in the kitchen
Я карыстаюся магчымасцю і ем зараз як мага больш спаржы. Гэта вельмі смачная гародніна і бадай што самая любімая ежа пячонкі, бо гэта самы моцны прадукт (разам з брусэльскай капустай) для яе ачышчэння. Так што вельмі раю паласавацца далікатэсам у сезон і па магчымасці замарозіць запас на зіму.
Дарэчы, зялёную спаржу дастаткова толькі добра памыць перад гатаваннем, а вось белую трэба чысціць — усю сцябліну акрамя самай вяршыні. Я чышчу спецыяльным нажом для агародніны — вельмі зручна.
4 ідэі прыгатавання ад Greenmom in the kitchen
- Вару на пары хвілін 7 і потым, гатовую, паліваю сокам лімона. Варыць на пары — самы далікатны спосаб тэрмаапрацоўкі любых прадуктаў, так у іх захоўваецца максімум вітамінаў і мінералаў. І гэта той спосаб, якому я аддаю перавагу.
- Запякаю з лімонным сокам і чорным перцам — каля 15-20 хвілін на 180 градусах.
- Рэжу сырую спаржу ў салат — ідэальна з рукалай, памідорамі, чырвонай цыбуляй. І з сокам лімона ў якасці запраўкі.
- Я заўжды абломваю ніжнія канцы спаржы — гну сцяблінку з ніжняга канца і, дзе выходзіць, там і ламаю роўна столькі, колькі абломваецца. Гэтыя хвасты мыю і выціскаю з іх сок. Сок потым дадаю ў смузі альбо змешваю са свежым яблычным сокам. (Ад Сойкі: гэтыя хвасты таксама можна замарозіць, каб узімку дадаваць у гароднінныя булёны.)
Тарт з крапівой і спаржай ад Аліны Коўшык
Патрэбна:
- салідная жменя маладой крапівы
- каля 8 зялёных сцяблінаў спаржы
- паўшклянкі смятаны (ці натуральнага ёгурту)
- 4 яйкі
- каля шклянкі мукі
- 100 гр масла
- соль
- чабор
- фета
Робім цеста. Да шклянкі мукі дадаем соль, жаўток, 2 лыжкі смятаны, масла і замешваем цеста. Калі не вельмі добра клеіцца, то дадамо крыху (!) вады. Гатовае цеста паўгадзіны варта пратрымаць у лядоўні, хоць мне вельмі рэдка гэта ўдаецца. Духоўку ўключаем на 180 градусаў. Цеста раскатаем, форму змажам маслам ці выкладзем паперай для запякання. Пячэм каля 15-20 хвілінаў да залацістага колеру. Тры яйкі і бялок, што застаўся ад цеста, змешваем блэндарам са смятанай, соллю і чабаром. Крапіву мыем і выкладваем на падпечаны корж. Спаржу мыем, адразаем 3 см ад канца. Наверх крапівы кладзем сцябліны спаржы. Заліваем яечнай масай і пячэм паўгадзіны. За 5 хвілінаў да канца пячэння пасыпаем сырам фета.
Спадабаўся матэрыял? Падзяліся з сябрамi!
